اورمو اؤلکه سی

نویسنده : admin چهارشنبه 2 فروردین 1391, 11:00

منظومه حیدر بابا

 

                اثر: استاد شهریار

 

حیدر بابا ایلدریملار شاخاندا

سللر سولار شاقیلدیوب آخاندا

قیزلار اونا صف باقلیوب باخاندا

                 سلام اولسون شوکتوزه ائلوزه

                منیم ده بیر آدیم گلسین دیلوزه



حیدر بابا ایلدریملار شاخاندا                    1

سللر سولار شاقّیلدیوب آخاندا

قیزلار اونا صف باقلیوب باخاندا

            سلام اولسون شوکتوزه ائلوزه

            منیم ده بیر آدیم گلسین دیلوزه

*******************************

حیدر بابا کهلیکلرون اوچاندا                  2

کول دیبینّن دوشان قالخیب قاچاندا

باخچالارون چیچکلنیب آچاندا

            بیزدنده بیر ممکن اولسا یاد ایله

            آچیلمیان اورکلری شاد ایله

*******************************

بایرام یئلی چارداخلاری ییخاندا              3

نوروز گلی قار چیچگی چیخاندا

آغ بولوتلار کوینکلرین سیخاندا

            بیزدنده بیر یاد ایلیه ن ساغ اولسون

            دردلریمیز قوی دیکلسین داغ اولسون

*******************************

حیدر بابا گون دالوی داغلاسین               4

یوزون گولسون بولاخلارون آغلاسین

اوشاخلارون بیر دسته گل باغلاسین

              یئل گلنده ور گتیرسین  بویانا

             بلکه منیم یاتمیش بختیم اویانا

******************************

حیدر بابا سنون یوزون آغ اولسون          5

دؤرت بیر یانون بولاغ اولسون باغ اولسون

بیزدن سورا سنون باشون ساغ اولسون

              دنیا قضو-قدر،ئولوم- ایتیمدی

              دنیا بویی اوغولسوزدی ،یتیمدی

*******************************

حیدر بابا یولوم سننن کج اولدی             6

عمروم کچدی گلممه دیم گج اولدی

هئچ بیلمه دیم گؤزللرین نج اولدی

              بیلمزایدیم دنگه لر وار دونوم وار

              ایتگین لیک وار آیرلیق وار ئولوم وار

*******************************

حیدر بابا ایگیت امک ایتیرمز                   7

عمر کچه ر ،افسوس بره بیتیرمز

نامرد اولان عمری باشا یتیرمز

              بیزده وآللاه اونوتماریق سیزلری

              گؤرممسک حلال ائدون بیزلری

*******************************

حیدر بابا میر اژدر سسلننده                 8

کند ایچینه سسدن-کویدن دوشنده

عاشق رستم سازین دیللندیرنده

              یادوندادی نه هولسک قاچاردیم؟

              قوشلار تکین قاناد چالیب اوچاردیم.

*******************************

شنگل آوا یوردی عاشیق آلماسی          9

گاهدا گئدوب اوردا قوناخ قالماسی

داش آتماسی آلما هیوا آتماسی

              قالیب شیرین یوخی کیمی یادیمدا

              اثر قویوب روحیمدا هر زادیمدا

******************************

حیدر بابا قوری گؤلون قازلاری              10

گدیکلرون سازاق چالان سازلاری

کت- کؤشنین پاییزلاری یازلاری

              بیر سینما پرده سی دیر گؤزومده

              تک اوتوروب سیر ائدیرم ئوزومده

******************************

حیدر بابا قره چمن جاداسی               11

چووشلارین گله ر سسی-صداسی

کربلیا گئدنلرین قاداسی

             دوشسون بو آج یولسوزلارین گؤزونه

             تمدّنون اویدوخ یالان سؤزونه

*******************************

حیدر بابا شیطان بیزی آزدیریپ              12

محبتی اورکلردن قازدیریپ

قره گونون سرنوشتین یازدیریپ

             سالب خلقی بیر بیرینون جانینا

            بارشیغی بلشدیروب قانینا

******************************

گؤز یاشینا باخان اولسا قان آخماز        13

انسان اولان خنجر بئلینه تاخماز

امّا حیف کور توتدوغون بوراخماز

            بهشتیمیز جهنّم اولماقدادیر

            ذیحجّه میز محرّم اولماقدادیر

*****************************

خزان یئلی یارپاخلاری تؤکنده             14

بولوت داغدان ینیب کنده چؤکنده

شیخ الاسلام گؤزل سسین چکنده

            نسکللی سؤز اورکلره دیردی

            آغاشلاردا آللاها باش ایه ر دی

*****************************

داشلی بولاخ داش قومونان دولماسین  15

باخچالاری سارالماسین سولماسین

اوردان کچن آتلی سوسوز اولماسین

            دینه بولاخ خیرون اولسون آخارسان

            افقلره خمار-خمار باخارسان

*****************************

حیدر بابا داغین داشین سره سی       16

کهلیک اوخور دالیسیندا فره سی

قوزولارین آغی بوزی قره سی

           بیر گئدیدیم داغ دره لر اوزونی

           اوخوییدیم ((چوبان قیتر قوزونی))

****************************

حیدر بابا سولی یرین دوزونده           17

بولاخ قینر چای چمنین گؤزونده

بولاغ اوتی اوزه ر سویون یوزونده

           گؤزل قوشلار اوردان گلیب کچللر

           خلوتلیوب بولاخدان سو ایچللر

***************************

بیچین اوستی سنبل بیچن اوراخلار   18

ایله بیل که زلفی دارار داراخلار

شکارچیلار بیلدیرچینی سوراخلار

           بیچین چیلر آیرانلارین ایچللر

           بیر هوشلانیب سوندان دوروب بیچللر

****************************

حیدر بابا کندین گونی باتاندا             19

اوشاقلارون شامین ییوب یاتاندا

آی بولوتدان چیخوب قاش- گؤز آتاندا

           بیزدنده بیر سن اولارا قصه ده

          قصه میزده چوخلی غم و غصّه ده

***************************

قاری ننه گئجه ناغیل دینده            20

کولک قالخیب قاب-باجانی دؤینده

قورد گئچینین شنگلسین یینده

            من قایدیب بیرده اوشاق اولیدیم

            بیر گل آچیب اوننان سورا سولیدیم

***************************

عمّه جانین بال بلله سین ییه ردیم    21     

سوندان دوروب اوس دونومی گییه ردیم

باخچالاردا تیرینگنی دییه ردیم

             آی ئوزومی او ازدیرن گونلریم

             آغاج مینوب آت گزدیرن گونلریم

***************************

هجی خالا چایدا پالتار یوواردی        22

ممد صادق داملارینی سوواردی

هچ بیلمزدیک داغدی داشدی دوواردی

            هر یان گلیب شیللاق آتوب آشاردیق

            آلله نه خوش غمسیز -غمسیز یاشاردیق

****************************

شیخ الاسلام مناجاتی دییه ردی       23

مشد رحیم لباده نی گییه ردی

مشد آجلی بوز باشلاری ییه ردی

          بیز خوشودوق خیرات اولسون توی اولسون

          فرق ایله مز هر نولاجاق قوی اولسون

*****************************

ملک نیاز ورندلین سالاردی                 24

آتین چاپوپ قیقاجیدان چالردی

قیرقی نکین گدیک باشین آلاردی

           دولائیا قیزلار آچیپ پنجره

           پنجره لر ده نه گؤزل منظره

****************************

حیدر بابا کندین تویون توتاندا             25

قیز-گلینلر،حنا-پیلته ساتاندا

بیگ،گلینه دامنان آلما آتاندا

           منیمده او قیزلاریندا گؤزوم وار

           عاشیقلارین سازلاریندا سؤزوم وار

*****************************

حیدر بابا بولاخلارین یارپیزی                26

بوستانلارین گلبسری قارپیزی

چرچیلرین اغ نباتی ساققیزی

            ایندیده وار داماغیمدا داد وره ر

            ایتگین گئدن کونلریمدن یاد وره ر

*****************************

بایرامیدی گئجه قوشی اوخوردی         27

آداخلی قیز بیک جورابین توخوردی

هر کس شالین بیر باجادان سوخوردی

             آی نه گؤزل قایدادی شال ساللاماق

             بیک شالینا بایراملغین باغلاماق

*****************************

شال ایسته دیم منده ائوده آغلادیم      28

بیر شال آلیب تئز بئلیمه باغلادیم

غلام گیله قاشدیم شالی ساللادیم

            فاطما خالا منه جوراب باغلادی

            خان ننه می یادا سالیب آغلادی

*****************************

حیدر بابا میرزممدین باخچاسی           29

باخچالارین تورشا شیرین آلچاسی

گلینلرین دوزمه لری طاخچاسی

          هی دوزولور گؤزلریمین رفینده

          خیمه وورار خاطره لر صفینده

****************************

بایرام اولوب قیزیل پالچیق ازللر          30

ناقیش ووروب اتاقلاری بزللر

طاخجالارا دوزمه لری دوزللر

            قیز-گلینین فندقچاسی حناسی

            هوسلنه ر آناسی قایناناسی

***************************

باکی چینین سؤزی سووی کاغذی   31

اینکلرین بولاماسی آغزی

چرشنبه نین گردکانی مویزی

             قیزلار دییه ر آتیل-باتیل چرشنبه

            آینا تکین بختیم آچیل چرشنبه

***************************

یومورتانی گؤیچک گلّی بویاردیق       32

جاقّیشدریب سینانلارین سویاردیق

اویناماقدان بیرجه مگر دویاردیق

            علی منه یاشیل آشیق وئرردی

            ارضا منه نوروز گلی درردی

***************************

نوروز علی خرمنده ول سورردی       33

گاهدان ینوب کولشلری کورردی

داغداندا بیر چوبان ایتی هورردی

             اوندا گؤردون الاخ ایاخ ساخلادی

             داغا باخیب قولاخلارین شاخلادی

****************************

آخشام باشی ناخیر یلان گلنده        34

قودوخلاری چکیب ووراردیق بنده

ناخیر گچیب-گئدیب یتنده کنده

            حیوانلاری چلپاق مینوب قوواردیق

            سؤز چخسیدی سینه گریب سوواردیق

******************************

یاز گئجه سی چایدا سولار شاریلدار      35    

داش-قیه لر سلده آشیب خاریلدار

قانلیقدا قوردون گؤزی پاریلدار

           ایتلر گؤردون قوردی سئچوب اولاشدی

           قورددا گؤردون قالخیب گدیکدن آشدی

*******************************

قیش گئجه سی طوله لرین اتاغی          36

کتلیلرین اوتراغی یاتاغی

بخایدا یانار اوتون یاناغی

            شبچره سی گردکانی ایده سی

            کنده باسار گولوب دانشماق سسی

*******************************

شجا خال اوغلونون باکی سوقتی           37

دامدا قوران سماواری صحبتی

یادیمدادی شسلی قدی-قامتی

           جونم مگون تویی دؤنوب یاس اولدی

           ننه قیزین بخت آیناسی کاس اولدی

*******************************

حیدر بابا ننه قیزین گوزلری                    38

رخشنده نین شیرین -شیرین سؤزلری

ترکی دئدیم اوخوسونلار ئوزلری

            بیلسینلر که آدام گئدر آد قالار

            یاخشی پیسدن آغیزدا بیر داد قالار

*******************************

یاز قاباقی گون گونئی دؤینده                 39

کند اوشاغی قار گولله سین سؤینده

کورکچیلر داغدا کورک زوینده

            منیم روحوم ایله بیلون اوردادور

            کهلیک کیمین باتیب قالیب قاردادور

*******************************

قاری ننه اوزاداندا ایشینی                    40

گون بولوتدا ایرردی تشینی

قورد قوجالیب چکدیرنده دیشینی

           سوری قالخیب دولائیدان آشاردی

           بایدالارین سوتی آشیب -داشاردی

******************************

خجّه سلطان عمه دیشین قیساردی      41

ملا باقر عمواوغلی تئز میساردی

تندیر یانیب توستی ائوی باساردی

           چایدانمیز ارسین اوسته قایناردی

           قوورقامیز ساز ایچینده اویناردی

*****************************

بستان پوزوب گتیریردیک آشاغی         42

دولدوریردیق ائوده تاختا-طاباقی

تندیرلرده پیشیرردیک قاباغی

           ئوزون ییوب تخملارین چیتداردیق

           چوخ یمکدن لاپ آز قالا چاتداردیق

*****************************

ورزغاننان آرموت ساتان گلنده              43

اوشاقلارین سسی دوشردی کنده

بیزده بویاننان اشیدیب بیلنده

           شیللاق آتیب بیر قیشقیق سالاردیق

           بوغدا وئریب آرموتلاردان آلاردیق

********************************

میرزا تاغی نان گئجه گتدیک چایا              44

من باخیرام سلده بوغولموش آیا

بیردن ایشیق دوشدی اوتای باخچایا

            ای وای دئدیک قورددی قیتدیک قاشدیق

            هچ بیلمه دیک نه وقت گدیکدن آشدیق

********************************

حیدر بابا آغاجلارون اوجالدی                    45

امّا حیف جوانلارین قوجالدی

توخلیلارین آریخلیوب آجالدی

            کؤلگه دؤندی گون باتدی قاش قرلدی

           قوردون گؤزی قارانلیقدا برلدی

*********************************

اشیتمیشم یانیر آللاه چراغی                   46

دایر اولوب مسجدیزون بولاغی

راحت اولوب کندین ائوی-اوشاغی

            منصور خانین الی-قولی وار اولسون

            هاردا قالسا آللاه اونا یار اولسون

*******************************

حیدر بابا ملا ابراهیم وار یا یوخ؟               47

مکتب آچار اوخور اوشاقلار یا یوخ؟

خرمن اوستی مکتبی باغلار یا یوخ؟

          مندن آخوندا یتیررسن سلام

          ادبلی بیر سلام مالا کلام

*****************************

خجّه سلطان عمه گئدیب تبریزه          48

امّا نه تبریز که گلممیر بیزه

بالام دورون قویاخ گئداخ ائممیزه

          آقا ئولدی تفاقمیز داغیلدی

          قویون اولان یاد گئدوبن ساغیلدی

****************************

حیدر بابا دنیا یالان دنیادی                49

سلیماندان نوحدان قالن دنیادی

اوغول دوغان درده سالان دنیادی

          هر کیمسیه هر نه وئریب آلیبدی

          افلاطوندان بیر قوری آد قالیبدی

***************************

حیدر بابا یار-یولداشلار دؤندولر       50

بیر-بیر منی چؤلده قویوب چؤندولر

چشمه لریم چراغلاریم سؤندولر

          یامان یئرده گون دؤندی آخشام اولدی

         دنیا منه خرابه شام اولدی

***************************

عم اوغلینان گئدن گئجه قیپچاغا     51

آی که چیخدی آتلار گلدی اویناغا

دیرماشیردیق داغدان آشیردیق داغا

             مش ممی خان گؤی آتینی اویناتدی

             تفنگینی آشیردی شاققیلداتدی

*****************************

حیدر بابا قره کولون دره سی             52

خشکنابین یولی بندی بره سی

اوردا دوشر چیل کهلیگین فره سی

            اوردان گئچر یوردوموزون ئوزونه

            بیزده گئچک یوردوموزون سؤزونه

****************************

خشکنابی یامان گونه کیم سالیب؟    53

سیدلردن کیم قیرلیب کیم قالیب؟

آمیر غفار دام-داشینی کیم آلیب؟

           بولاخ گنه گلیب گؤلی دولدورور؟

           یا قورویوب باخچالاری سولدورور؟

***************************

آمیر غفار سیدلرین تاجیدی            54

شاهلار شکار ائتمه سی قیقاجی دی

مرده شیرین نامرده چوخ آجیدی

          مظلوملارین حقّی اوسته اسردی

          ظالملری قلیش تکین کسردی

***************************

میر مصطفی دایی اوجا بوی بابا      55

هیکللی ساققاللی تولستوی بابا

ایلردی یاس مجلسینی توی بابا

           خشکنابین آبروسی اردمی

           مسجدلرین مجلسلرین گؤرکمی

****************************

مجد السادات گولردی باغلار کیمی    56

گورولداردی بولوتلی داغلار کیمی

سؤز آغزیندا اریردی یاغلار کیمی

           آلنی آچیق یاخشی درین قاناردی

           یاشیل گؤزلر چراغ تکین یاناردی

*****************************

منیم آتام سفره لی بیر کیشیدی       57

ائل الیندن توتماق اونون ایشیدی

گؤزاارین آخره قالمیشیدی

           اوندان سورا دؤنر گه لر دؤندولر

           محبتین چراخلاری سؤندولر

*************************

میر صالحین دهدلی سولیق اتمه سی  58

میر عزیزین شیرین شاخسی گتمه سی

میر ممدین قورولملسی بیتمه سی

          ایندی دئسک احوالاتدی ناغیلدی

          گچدی گئتدی ایتدی باتدی داغیلدی

***************************

میر عبدلون آینادا قاش یاخماسی     59

جؤجلریندن قاشینون آخماسی

بویلانماسی دام دوواردان باخماسی

            شاه عباسین دوربینی یادش بخیر

           خشکنابین خوش گونی یادش بخیر

*****************************

ستاره عمه نزیکلری یاپاردی               60

میر قادرده هر دم بیرین قاپاردی

قاپوپ ییوب دایچا تکین چاپاردی

            گولمه لیدی اونون نزیک قاپپاسی

            عمه مینده ارسینیون شاپپاسی

****************************

حیدر بابا آمیر حیدر نینیور ؟             61

یقین گنه سماواری قینیور؟

دای قوجالیب آلت انگینه ن چینیور

           قولاخ باتیب گؤزی گیریب قاشینا

          یازیق عمه هاوا گلیب باشینا

*************************

خانم عمه میر عبدلون سؤزونی     62

ائشیدنده ایه ر آغزی گوزونی

ملکامدا وئرر اونون ئوزونی

          دعوالارین شوخلوغیلان قاتاللار

          اتی ییوب باشی آتوب یاتاللار

*************************

فضّه خانم خشکنابین گلییدی     63

آمیر یحیی عمقیزنون قولییدی

رخساره آرتسییدی سؤگلییدی

           سید حسین میر صالحی یانسیلار

           آمیر جعفر غیرتلیدیر قان سالار

***************************

سحر تئزدن ناخیر چیلار گلردی        64

قویون-قوزی،دام باجادا ملردی

عمه جانیم کؤرپه لرین بلردی

           تندیر لرین قاوزاناردی توستوسی

           چؤرکلرین گؤزل اییی-ایستیسی

***************************

گؤرچینلر دسته قالخیب اوچاللار      65

گون ساچاندا قیزیل پرده آچاللار

قیزیل پرده آچیب ییغیب قاچاللار

            گون اوجالیب آرتار داغین جلالی

            طبیعتین جوانلانار جمالی

***************************

حیدر بابا قارلی داغلار آشاندا          66

گئجه کروان یولون آشیب چاشاندا

من هارداسام تهراندا یا کاشاندا

             اوزاقلاردان گؤزوم سئچر اونلاری

             خیال گلیب آشیب گئچر اونلاری

***************************

بیر چیخیدیم ((دام قیه)) نین داشینا   67

بیر باخیدیم گچمیشینه یاشینا

بیر گؤریدیم نه لر گلیب باشینا

             منده اونون قارلاریلان آغلاردیم

             قیش دوندوران اورکلری داغلاردیم

****************************

حیدر بابا گل غنچه سی خنداندی     68

امّا حیف اورک غذاسی قاندی

زندگانلیق بیر قارانلیق زنداندی

            بو زندانین دربچه سین آچان یوخ

            بو دارلیقدان بیر قورتولوب قاچان یوخ

****************************

حیدر بابا گؤیلر بوتون دوماندی           69

گونلریمیز بیر-بیریندن یاماندی

بیر بیروزدن آیریلماین آماندی

            یاخشیلیغی المیزدن آلیبلار

            یاخشی بیزی یامان گونه سالیبلار

***************************

بیر سوروشون بو قارقینمیش فلکدن  70

نه ایستیور بو قوردوغی کلکدن

دینه گچیرت اولدوزلاری الکدن

           قوی تؤکولسون بو یئر یوزی داغیلسین

           بو شیطانلیق قورقوسی بیر یغیلسین

******************************

بیر اوچیدیم بوچرپینان یئلینن              71

باغلاشیدیم داغدان آشان سئلینن

آغلاشیدیم اوزاق دوشن ائلینن

            بیر گؤریدیم آیرلیغی کیم سالدی

           اؤلکه میزده کیم قیریلدی کیم قالدی

***************************

من سنون تک داغا سالدیم نفسی   72

سنده قیتر گؤیلره سال بو سسی

بایقوشوندا دار اولماسین قفسی

           بوردا بیر شیر داردا قالیب باغیریر

           مروّتسیز انسانلاری چاغیریر

*************************

حیدر بابا غیرت قانون قاینار کن    73

قره قوشلار سنن قوپوب قالخار کن

اوسیلدیریم داشلارینان اوینار کن

           قوزان منیم همتمی اوردا گؤر

          اوردان اییل قامتمی داردا گؤر

*************************

حیدر بابا گئجه دورنا گئچنده       74

کور اوغلونونگؤزی قارا سئچنده

قیر آتینی مینوب کسیب بیچنده

            منده بوردان تئز مطلبه چاتمارام

           ایوز گلیب چاتمیونجان یاتمارام

**************************

حیدر بابا مرد اوغوللار دوغگینان     75

نامردلرین بورونلارین اوغگینان

گدیکلرده قوردلاری توت بوغگینان

           قوی قوزولار آیین- شایین اوتلاسین

           قویونلارون قویروقلارین قاتلاسین

**************************

حیدر بابا سنون گؤیلون شاد اولسون  76

دنیا وارکن آغزون دولی داد اولسون

سنّن گئچه ن تانیش اولسون یاد اولسون

            دینه منیم شاعر اوغلوم شهریار

           بیر عمردور غم اوستونه غم قالار


وبلاگ اورمو اؤلکه سی


دانلود فایل صوتی منظومه حیدر بابا - با صدای استاد شهریار

http://up.p30room.ir/uploads/141021242012721.gif


دسته بندی : استاد شهریار+شعر و عکس ,
برچسب ها : حیدر بابا , استاد شهریار , دانلود حیدر بابا ,



موضوعات
» اخبار اورمیه (903)
» اخبار بحران دریاچه اورمیه (1021)
» پروژه های عمرانی،خدماتی اورمیه (548)
» پروژه های عمرانی،خدماتی استان (172)
» سیاسی (178)
» اقتصادی (529)
» اجتماعی (323)
» ادب،فرهنگ و هنر (133)
» علمی، آموزشی (201)
» پزشکی،سلامت (204)
» میراث فرهنگی و گردشگری (401)
» حوادث و سوانح (227)
» هواشناسی (224)
» محیط زیست (261)
» گزارش تصویری (301)
» والیبال برتر (1077)
» ورزشی (218)
» اخبار ایران و جهان (218)
» وقایع تاریخی ایران و جهان (19)
» وقایع تاریخ آذربایجان (18)
» وقایع تاریخی اورمیه (10)
» تورک دیلی (8)
» نام آوران اورمیه (88)
» نام آوران آذربایجان (127)
» آذربایجان فولکلوری (11)
» آذربایجان دبلری (19)
» مذهبی دبلر (31)
» اورمو عاشیقلاری (19)
» موسیقی آذربایجانی (19)
» تورک شعرلر (7)
» استاد شهریار+شعر و عکس (10)
» داستان ها و افسانه های آذربایجان (8)
» فرودگاه اورمیه (3)
» دانشگاه اورمیه (10)
» امام زاده ها - مساجد تاریخی (24)
» بناهای تاریخی اورمیه (104)
» پارک های اورمیه (17)
» حمام های قدیمی اورمیه (5)
» دره ها-آبشارها -چشمه ها (18)
» قلعه ها -تپه ها-غارها (22)
» کلیساهای اورمیه (17)
» کتیبه های تاریخی اورمیه (7)
» مراکز اقامتی و تفریحی اورمیه (12)
» مقبره های اورمیه (10)
» موزه های اورمیه (12)
» در باره اورمیه (12)
» سوغات،صنایع دستی،غذاها (19)
» جاذبه های گردشگری و طبیعی اورمیه (60)
» گالری عکس بازار اورمیه (8)
» گالری عکس دریاچه اورمیه (33)
» گالری عکس اورمیه (60)
» گالری عکس اورمیه قدیم (11)
» آثار طبیعی آذربایجان غربی (36)
» آثار تاریخی آذربایجان غربی (104)
» گالری عکس سایر مناطق آذربایجان (25)
» تصاویر دیدنی (40)
» کلیپ شعرای آذربایجان (5)
» کلیپ اورمیه (5)
» کلیپ موسیقی آذربایجانی (7)
» کلیپ ورزشی (8)
» کلیپ های متفرقه (10)
» دانلود فایل های صوتی (5)

صفحات

پیوندهای روزانه

نویسندگان

» admin (6558)

آمار بازدید


کل بازدید ها :
بازدید امروز :
بازدید دیروز :
بازدید این ماه :
بازدید ماه قبل :
تعداد نویسندگان :
تعداد کل مطالب :
آخرین بروز رسانی :

شبکه اجتماعی فارسی کلوب | Buy Mobile Traffic | سایت سوالات